Onnatuurlike karakters

Glo jy aan spoke?  Dink jy dat dit moontlik is dat iemand kan sterf en kan begin ronddwaal?  Die meerderheid van spoke waarvan ek gehoor het, is skadeloos, dit beteken egter nie dat ek een met die hand wil groet nie.  Baie mense word gefassineer deur spoke, ek is nie een van hulle nie.  Soos die meerderheid mense laat ek ‘n moontlikheid toe dat hulle dalk bestaan, maar staan redelik skepties teen oor die idee.

Glo jy in Engele?  Ek doen, onbeskaamd en sonder bewyse.  Nee, ek het nog nie een gesien nie, maar glo wel dat ek ‘n spesiale engel het wat na my kyk.  As God in die Bybel se tyd engele kon stuur, hoekom nie vandag ook nie?

Glo jy aan feetjies?  Baie van ons is mal oor feetjies.  Oor kabouters en nimfe, maar aanvaar dat hulle net sprokie karakters is.  Dit keer ons egter nie om bos te gaan oor hulle en ons in hulle wêreld in te leef nie.  Oor die algemeen word kabouters en fees oral aanvaar.  Mits hulle nie spesiale magte het nie.

Daar is al iets wat my vir jare lank al pla.  Oor die algemeen word Lord of the Rings en Narnia as aanvaarbare stories vir Christenne beskou.  Mense sien dit vir wat dit is, fantasie, die penvrug van iemand se verbeelding.  Maar Harry Potter en superhelde is gewoonlik van die duiwel.  Kan iemand dit vir my verduidelik?  Gandalf toor net so lekker en weird goed gebeur deur die hele spektrum.

Hoekom word mense veroordeel as hulle spoke ondersoek, maar nie as hulle oor fees gagga raak nie? 

Indien iemand nog nie weet nie, die vorige blog inskrywing is uit my duim uitgesuig.  Ek kon nie gou genoeg ‘n goeie spookstrorie onthou nie en het toe my eie gemaak.  Die enigste feit daarin was dat ek vir Tinkerbell na die blogjol gaan aflaai het.

Ek is jammer dat ek sommige mense ontstel het en van hulle nagrus beroof het.  Dit was nie my bedoeling nie.  Ek het egter ‘n talent ontdek wat ek nie besef het ek kan doen nie.

Blogvraag:  Wat was Dawie Kabouter se Vos se naam?

Blogantwoord:  ‘n Vroulike spook wat kinders oppas en name roep.