Nou wie se skuld is dit eintlik?

Het julle al opgelet hoe motoriste altyd verantwoordelik vir enige ongeluk is?  Of die ander party ‘n fietsryer, ‘n voetganer of ‘n trein was.  As ‘n kat op die snelweg kraam, was dit seker ook die motoris wat laaste daar verby gery het se skuld.

Volgens wet mag daar nie voetgangers op enige snelweg wees nie.  Dit gaan seker nie lank wees nie of een of ander idioot gaan verf sebrastrepe op die pad.  Party dae lyk dit amper asof daar meer voetgangers as karre op die snelweg is.  Ry nou net een raak en jy sit verseker met ‘n klag van poging tot moord / manslag teen jou.  Al was dit in die middel van die nag, die ‘arme slagoffer’ in swart geklee en jy binne die spoedgrens gery het.  Jy het hom raakgery, hy sal nooit in jou vasgeloop het nie.

Enige motorfietsryer wat blog het al gedreig wat van iemand sal word wat ‘n mater verongeluk.  Die dreigement behels gewoonlik dat daar baie motorfietsryers in motors is.  Hulle vleg roekeloos deur die verkeer en verwag voorgang by alle karre.  Ek mag verkeerd wees, maar toe ek my leerling vir ‘n motorfiets gekry het, het ek verstaan dat jy nie tussen karre mag deurjaag nie.  Soos enige ander voertuig moet jy links hou en regs verby gaan.  Ek moet nog sien waar sê dit dat die stippellyn vir motorfietse opsy gesit is.

Daardie erg gestremdes wat by verkeersligte tussen twee bane gesit word om te bedel.  Dikwels is hulle op hulle knieë of op hulle basse.  Mens sien hulle eers as jy verby hulle ry.  Ek kan selfs twee spesifieke voorbeelde noem, daar is een by Menlyn se Garsfontein uitgang en een by Fonteine sirkel.  Ek wonder altyd of dit ‘n lonende manier van selfmoord pleeg is?  Iemand sit hulle daar neer, waar hulle die heeldag bedel.  Die “weldoeners” doen dit waarskynlik teen ‘n kommissie.  Dit is uitbuiting.  Laat ek net een vang wat dit doen, dan ry ek hom/haar vrek.  En gaan met ‘n glimlag tronk toe.

Gaan daar ooit ‘n dag kom waar die skuld voor die regte party gelê gaan word?  Of is motoriste die grootste varke onder die son?

Blogvraag:  Wie is die huidige minister van vervoer?

Blogantwoord:  Tussen 25 November (International Day of No Violence against Woman) en 10 Desember (International Human Rights Day)