As daar maar pille was . . .

Ek tel die versugting vir onbekende pille by Wipneus op.  Natuurlik nie vir myself nie, eerder vir diegene wat ek uit die diepte van my hart bejammer.

Ek het al daarmee verlief geneem dat daar nooit pille vir domheid gaan wees nie.  Indien dit moontlik was, was die regering onder verpligting om dit gratis uit te deel.  Die persoon wat daardie verbinding kan formuleer gaan ‘n Nobelprys kry.  Die aarde sal vir altyd by haar in die skuld wees. 

Kan iemand nie aan ‘n pil werk vir vroue wat in die huwelik mishandel word nie?  Duidelik maak ‘n klap of 2 hulle nie wakker nie.  Hopenlik kan die pil die skille van hulle oë af laat val.  Ek kan nie verwag dat die pille verniet uitgedeel moet word nie.  Dit gaan ‘n sterk mengsel moet wees om goedgelowigheid en ongegronde hoop teen te werk. 

 Stiksienigheid is ongelukkig nie altyd dieselfde as domheid nie.  Daar is baie intelligente mense wat nie verder as hulle neuse kan sien nie.  Alles is vir hulle wit of swart.  As jy nou dink ek verwys na jou velkleur, is jy een van hulle.

Amper vergeet ek, kan iemand asseblief ‘n baie slegte pil vir liggeraakte mense maak?  Ek praat van mense wat aanstoot neem as iemand net na hulle kyk.  Wat hulle vererg vir die onskuldigste grappie.  Wat ‘n ander mening as ‘n persoonlike aanval sien.  Die pil moet sleg wees, sodat ek persoonlik kan wraak neem. 

Dit is seker genoeg vir ‘n begin.  Ek kan ‘n boek skryf oor die pille wat nodig is om die wêreld ‘n beter plek te maak.  Ek het nie ‘n woord gesê vir pille vir verkragters, wreedaards, skynheiliges of snobbe nie.  Vertel my waarvoor sal julle graag pille wil ontwikkel.

As pille nie werk nie, moet ons dalk ‘n toordokter nader trek.

Blogvraag:  Wat is die hoofbestandele van Grand Pa?

Blogantwoord:  Willes was reg met 1915 – 1922.