Luiheid

Demoerin het mooi prentjies geteken hoekom luiheid ‘n doodsonde is.  Van al die ander wat hy beskryf het, het luiheid niks met die duiwel uit te waai nie.  Die duiwel is baie dinge, maar geen mens kan hom van luiheid beskuldig nie.  Niks doen is een ding, maar moet net nie verveeld raak nie.  Ledigheid bly nou maar een maal die duiwel se oorkussing.

Ek voel sterk daaroor dat luiheid dikwels nie die erkenning kry wat dit verdien nie.  Luiheid en seker in ‘n mate gemaksug met ‘n tikseltjie kreatiwiteit het ons lewe baie makliker gemaak.  Kom ons begin by die kleinhuisie.  As dit nie was dat iemand te lui was om in die middel van die nag na buite te loop om te ontlas nie, het ons almal vandag nog na buite geloop.  Ek het een keer in ‘n (Afrikaanse) fliek gesien watter bohaai daar oor ‘n binne toilet was.  Mense het gedink dit is onhigienies en sommer gross.  Ons dink vandag net mooi die teenoorgestelde van hulle.

Dink net as almal heeltemaal tevrede was om ‘n vuur te maak om koffie te maak.  Daar sou nie vandag kettels gewees het nie.  Al ooit voortgeploeter sonder ‘n elektriese kettel?  As mense bereid was om elke oggend dou voor dag op te staan om mieliepap te kook nie, was daar nie vandag kitspap wat in elk geval lekkerder proe nie.  As mense bereid was om 30000 identiese briewe te skryf, het ons nie vandag met rekenaars gesit nie.  Genade, as mense nie moeg geraak het van hardloop met ‘n boodskap nie (of om die posduifhok skoon te maak nie) dan was daar nie vandag telefone, selfone of epos nie.

‘n Lui mens doen nie noodwendig niks nie.  Hulle werk baie hard om die lewe makliker te maak.  Thomas Edison het meer as 2000 keer gesukkel voordat hy die gloeilamp reggekry het.  Net omdat hy te lui was om in die donker na ‘n kers en vuurhoutjies te soek.  Lui mense is darem nie selfsugtig nie, hulle deel graag hulle uitvinding met die wêreld. 

Hierdie lui mens het veral ‘n broertjie dood aan sleurwerk.  Die wat net nooit einde kry nie, maar wat wel gedoen moet word.  As ek enigsins ‘n uitvinder was, het ek iets gekry wat namens my kan file.  En huisskoonmaak.  En . . . Om alles te doen wat gaan verseker dat dit nie deel van my daaglikse bestaan is nie.  Daar is soveel beter dinge om in daardie tyd te doen.

Wie van julle is ywerige mense?  Wat het ons vandag wat verseker dat die lewe nie vir ons sleur nie?

Blogvraag:  Wie het die voorloper van die spoel toilet in 1596 ontwikkel?

Blogantwoord:  Willes was reg met The Gods must be crazy.  Maxi was reg met die antwoord op Wit geskiedenis (die vorige post was al lank terug geskeduleer.  Voordat iemand geantwoord het.)