Die wit geskiedenis

In ‘n vorige bedeling was 10 Oktober Krugerdag gewees.  Dit beteken natuurlik dat ons ‘n langnaweek sou kon geniet het.  Tot vandag toe weet ek nie hoekom juis Paul Kruger so belangrik was dat sy verjaarsdag tot inderewigheid gevier moes word nie.  Ek is nie juis ‘n groot Kruger aanhanger nie, na my mening was hy stiksienig.

Punt is dat ek wel weet wie en wat Paul Kruger is.  Ek is waarskynlik die laaste generasie wie gaan weet van oom Paul, van Bloedrivier, die Groot Trek en natuurlik Jan van Riebeek.  Die regering is vasbeslote om die geskiedenis te herskryf.  Hulle weergawe, wat volgens hulle die waarheid is.  Ek sê geensins dat die weergawe wat ek op skool geleer het die volle waarheid was nie.  As ek byvoorbeeld aan Bloedrivier dink, kan ek regtig nie sien hoe die water bloedrooi geword het nie.  Ek dink die laaster water wat bloed was, was in Moses se tyd.

Die nuwe geskiedenis gaan ook waarskynlik nie ‘n paar goeie stories met feite bederf nie.  Ek vrees dat dit daarop uit sal gaan om die blankes in die slegte lig te stel.  Deesdae is jou grootste sonde as ‘n witmens om trots op jou herkoms te wees.  Nie alles was boos nie.  Daar rus op die nuwe generasies se ouers ‘n groot verantwoordelikheid.  Hulle moet verseker dat die geskiedenis nie verlore gaan nie.  Hulle moet hulle kinders opvoed om die agtergrond te verstaan.

Tog moet die kinders nie verhoed word om die ander weergawe ook te hoor nie.  Hulle moet beide kante hê om ‘n ten volle ingeligte besluit te kan neem wie reg en wie verkeerd is.  Daar is wel ‘n probleem met my sienswyse.  Bittermin mense ken hulle eie geskiedenis.  Dit is maklik om die alternatief te probeer doodskree as om agter die kap van die byl te kom.  Makliker nog, beskou geskiedenis as dood en waardeloos.

Hoe voel julle ook die blank Suid-Afrikaner se geskiedenis?  Hoe goed ken julle die nie-blanke Suid-Afrikaner se geskiedenis?

Blogvraag:  Wat het die Tswanes Paul Kruger genoem?

Blogantwoord:  Willes was reg met Sir Walter Raleigh.