Ek is ‘n Pretorianer . . .

 . . . en ek is trots daarop.

Die stad met sonsondergang

Toegegee, ons het nie ‘n platklip of die see nie, ons het nie ‘n straatresiesbaan nie, ons het nie ‘n natuurlike waterval nie en ons sit met die Bulle op gesaal.  Tog is Pretoria my huis en wil ek op die oomblik nêrens anders bly nie.  Ek is nie ‘n gebore Pretorianer nie en het nie in Pretoria groot geword nie.

Na my mening het Pretoria goeie mense.  Vriendelik, plat op die aarde en gewoond aan sogenaamde bekende mense.  Die president bly 6 maande van die jaar in Pretoria (behalwe Mbeki, hy bly 8 maande van die jaar in die lug) en dit is ook die tuiste van verskeie springbokke en vermaakkunstenaars.  Pretoria het iets vir elke smaak.  Daar is verskeie parke en reservate vir die natuurliefhebbers (soos Olga sê, sommer in die middel van die stad), daar is verskeie teaters vir die kultuurgeesdriftigers, baie monumente vir die geskiedenis freaks en verskeie groot sportgronde vir die sportaanhangers. 

My een vriendin (van Johannesburg) spot altyd dat almal in Pretoria mekaar ken.  Dit is baie oordryf, maar Pretoria is ‘n stad met ‘n dorpsgevoel.  Dit is in 1855 deur Marthinus Pretorius gestig, wat die dorp na sy pa, Andries, vernoem het.  Andries Pretorius is my gunsteling voortrekker, ek sal op ‘n ander dag vertel hoekom.  Van sy ontstaan af was die stad die middelpunt van politieke bedrywigheid.  Vandag nog is dit die hoofstad van die land.

Pretoria is veral bekend vir die Jakarandas wat nou weer kop uitsteek.  Pretoria het die grootste en die beste universiteit in die land.  Die dieretuin verdien spesiale vermelding, as ek kon het ek in die dieretuin ‘n huis laat bou.  Die Voortrekkermonument kan van ver af gesien word, skaam jou as jy dit nog nie besoek het nie.  Pretoria voel Afrikaans, ten spyte daarvan dat dit die tuistes van verskeie ambassades en kulture is.  Deel van die rede hoekom verandering op ons afgedwing word?  Afrikaanssprekendes vorm die tweede grootste bevolkingsgroep, ‘n kort kop na Sepedisprekendes.

Persoonlik dink ek die kroon van Pretoria lê op Meintjieskop.  Die Uniegebou is in 1910, kort na die totstandkoming van die Unie, begin bou.  1265 werkers het vir meer as 3 jaar geswoeg om die 285 m lange gebou te voltooi.  Dit was deur Sir Herbert Baker ontwerp en het £1,310,640 gekos om te bou.  Enige mens sal in vervoering staan oor die tuine wat die gebou omring. 

Die Uniegebou

Die ANC jeugliga wil die naam verander, maar ek dink dit is vandag nog meer van toepassing as in 1913.  Die gebou het twee vleuels wat bymekaar kom in ‘n halwe sirkel.  Die vereniging van 2 verwyderde groepe om ‘n Unie te vorm.  Of dit nou die vereniging van Boer en Brit, of die vereniging van Wit en Swart is, ons moet vandag nog streef na eenheid.

En die ratrace?  Ek geniet elke oomblik daarvan.

Hoekom bly julle waar julle bly?  Wat dink julle van Pretoria?  Waar wil julle graag bly.

Blogvraag:  Hoe lyk Pretoria se vlag?

*he he he*

Nats

Blogantwoord:  Olga was die naaste aan reg.  Die aandeelhouers is Tata Communications, Nexus Connextions, Communitel en Two Consortium.