Jakarandas op my voorstoep.

Enige gesoute Pretorianer sal jou kan vertel dat wanneer die stad sy pers kombers aantrek, raak dit tyd om die boeke nader te sleep.  Dit is dan Oktober, die tyd om te kyk wat te redde is.  Jy kan altyd die kortpad manier beproef.  Gaan sit onder ‘n boom en wag totdat ‘n blommetjie op jou kop val.  Jy sal dan glo al jou eksamens deur kom.

More is eerste erfenisdag en daarna braaidag.  Vorige geslagte het ons ‘n pragtige Jakaranda erfenis gelaat in Pretoria.  Pretoria is nie die enigste stad wat met ‘n Jakaranda kleed spog nie, maar dra nogtans die naam Jakarandastad, wat internasionaal aanvaar word.  Selfs beweer die jaloerses oorkant die Jukskei dat hulle Jakarandas mooier is.

Jakarandas is nie ‘n inheemse boom nie.  James Clarke het die saad in die 1880’s ingevoer.  Die eerste twee bome is in 1888 by ‘n skool in Arcadia geplant.  Kort daarna was die bome in Kochstraat (vandag Bosman) geplant.  Die vet was in die vuur en ‘n Jakaranda ontploffing het gevolg.  Ek is nie seker hoekom nie, maar ek vermoed die mense het hulle mooi gevind.

Die Jakarandas wat ons ken is Jacaranda mimosifolia.  Die blou jakaranda.  Hulle kom oorspronklik van Suid en Sentral Amerika en is ook inheems aan die Karibiese Eilande.  Hulle kan temperature van tot -7 º C weerstaan, maar is nie bestand teen ryp nie.  Hulle word 5 – 15 m hoog.  Jakarandas het selfs medisinale waardes, hulle werk teen Bacillus, Staphylcoccus en E.coli.  Hulle hout kan ook gebruik word.  En julle het altyd net gedink dat hulle mooi is en jou lekker hooikoors kan gee.

Op die oomblik is dit onwettig om ‘n Jakarandaboom te plant.  Die regering het dit ‘n paar jaar gelede as ‘n indringerplant geidentifiseer.  Pretoria sal dus eendag nie meer die titel van Jakarandastad verdien nie.   (Ek stem saam dat ons uitheemse plante moet beperk, maar in die geval is die Jakaranda die kern van die stad.  Dit is amper al inheems.)

Erfenisdag is daar gestel om ons erfenis te waardeer en te herdenk.  ‘n Erfenis waarvoor daar deesdae hand en tand voor geveg moet word.  In plaas daarvan om almal hulle erfenis te gun en daarop voort te bou, word daar van die Afrikaner se erfenis verniel.  Selfs al is dit ‘n onskuldige boom, wat nie as ‘n probleemplant bewys is nie.  Jakarandas is deel van Pretoria se erfenis. 

Eers ‘n naamverandering, dan ‘n identiteitsroof.  Gevolg deur . . . ‘n herbevolking dalk?

Is ek onnodig sentimenteel?  Behoort alle Jakarandas voor die voet uitgeroei te word?  Waarmee behoort die Jakarandas in Pretoria vervang te word?  Is daar ‘n Suid-Afrikaanse dorp wat die nie-amtelike naam van iets inheems dra?  Rose en Eike is uitheemse plante?

Blogvraag:  In watter stad word ‘n jakaranda blommetjie wat op jou val, gesien as ‘n teken dat jy gaan druip?

Blogantwoord:  Willekjind is reg met arctophiles.