Vlieg Tag: Posduiwe

Aangesien ek almal aan die kopkrap het, is dit net regverdig dat ek my grysstof ook nader hark. 

Ek is mal oor posduiwe, maar ek kan ook baie kwaad vir hulle word.  Nee, die enigste warmbloedige duiwe wat ek sien is die wat dink oom Paul is ‘n toilet.  Ek praat van epos.  So lief ek vir blog is, kom niks by ‘n ietsie in die posduifhok nie.  As jy my dag wil maak, skryf vir my ‘n gesels epos.  Ek is nie ondankbaar vir goed wat aangestuur word nie, dit wys immers iemand dink aan jou (of het jou adres en hulle is desperaat om in die hemel te kom).

Ek hou nogal van gmail, meestal omdat maklik is om met ‘n selfoon in kontak te bly.  Die ongeluk van die saak is dat die posduiwe by gmail nie altyd van die flukste is nie.  Veral as jy nog ‘n prentjie of 10 wil saam stuur.  Dit is seker omdat gmail so baie van die duiwe moet aanstel dat hulle nie juis kieskeurig is nie.  Ek is te bang om die duif aan die vlieg te skop, netnou dooi hy sonder dat hy die boodskap gaan aflewer het.  Of erger, hy dooi in vlug en verloor my boodskap.  Die duiwe is ook nogal geneig om die scenic route (met ‘n paar kroeë) te volg.  En hulle raak so maklik dors. . .

Punt is dat epos baie ouer as baie van ons is. Epos was ingebruik lank voor die internet.  In 1961 het MIT die eerste keer die beginsels van epos geillustreer.  Netwerk epos, ek vermoed dit is wat ons vandag ken as pop-ups, het al in 1965 hulle ontstaan gehad.  Epos soos ons dit vandag ken is grootliks te dank aan ARPANET rekenaar netwerk wat al so vroeg as in in 1969 met intersisteem eposse begin het.  Ray Tomlinson het in 1971 die @ teken gebruik om die verbruiker en masjien te skei.

Volgens Wikipedia werk epos as volg.  Jy stuur stel ‘n epos by jou MUA (mail user agent) op.  Die MUA vertaal dit dan in die internet epos formaat en stuur dit met ’n program genaamd SMTP (Simple Mail Transfer Protocol) na die MTA (Mail Transfer Agent).  Die MTA verkry die Na-Adres van die SMTP.  Die epos adres is bekend as ‘n FQDA (Fully Qualified Domain Address).  Wanneer die MTA die Domain Name System (DNS) ontsyfer het, kan die Mail Exchange Server bepaal word wat die epos sal ontvang.  Die DNS server  van die ontvanger epos kan dan die epos van die Mail exchange server onderskep.  Die DNS stuur dit dan na die MTA van die ontvanger se epos.  Dmv SMTP word die epos dan in die mailbox afgelewer.  Die ontvanger kan dan die mail van sy MUA ontvang dmv die Post Office Protocol (POP3). 

Dit klink baie eenvoudiger by Wikipedia (daar is ‘n pragtige vloei diagram), maar dit bly steeds verstommend hoe vinnig alles gebeur.  ‘n Mens ontvang dikwels jou nuwe epos binne sekondes.  Baie vinniger as die eerstydse posduiwe.  Ek waardeer nou my posduiwe eers.

Kan jy nog sonder epos lewe?  Hou jy van eposse?  Hoe voel jy oor fw eposse?

Blogvraag:  Wanneer is gmail aan die publiek vrygestel?

Blogantwoord:  Capella is Latyns vir ”Little she goat” wat dan  seker klein bok ooitjie is.

Dit is oud maar steeds goud.