Is jy rigting bedonnerd?

Ek en ‘n vriendin het eendag ‘n ballet opvoering in Johannesburg gaan kyk.  Oppad terug het ons so effens gaan verken.  Dit is sag gestel, ons het ons asse af verdwaal.  Die beste van alles is ons het ‘n kaartboek by ons gehad.  Wat net mooi niks help as jy nie die straat kan kry waarop jy is nie.  Dus was die gou-gou op die agterste sitplek vergete geraak.  Ons het op ons instinkte  vertrou.  Dit het gewerk, ons het met ‘n baie vreemde pad wel by die huis gekom.  Sonder om in sirkels te ry.

In alle eerlikheid en opregheid; ek (en my vriendin) is besonders rigtingvas.  Ons het ‘n ingeboude radar wat ons druk in die rigting waarin ons behoort te gaan.  Ons is ook altwee goeie lesers wat verstaan wat ‘n blou bordjie met ‘n N-iets op beteken.  Ons weet ook gewoonlik min of meer met watter N-iets ons moet ry.  Ons geheue hou gewoonlik ook lank genoeg om te onthou hoe om die pad wat ons gevolg het om te keer. Daar is basies 2 redes hoekom ons verdwaal.  a)  Ons het ‘n klein besonderheid òf vergeet òf nie geweet nie.  Soos ons verkenningstog daardie Sondagmiddag, ons het nie geweet jy kan nie van Empire op die N1N klim nie.  b)  We take the road less travelled.  Wat soms ook gebeur is dat ons begin stry oor wie het nou eindlik die regte pad beet, tot ons ‘n 3 de pad kies wat DALK kan werk.  Na baie draaie en vasbyt werk dit dan ook gewoonlik.  Dit veroorsaak ook dat ons baie meer saam verdwaal as wanneer ons op ons eie is.

Met die verloop van tyd het ons agtergekom dat dit nogal lekker is om te verdwaal.  Dit lei ons op paaie wat ‘n GPS ons van sou beroof het.  Wat baie help is dat ons nie gou paniekerig raak nie.  Dus sit ons terug en geniet die rit.  Ek dink dat ons partykeer aspris verdwaal net om onsself mee besig te hou.  Dit was natuurlik die geval toe petrol nog R3/L was.  Die enigste reel is om nie te verdwaal wanneer dit amper donker is nie.  Veral nie in ‘n rowwe streek nie.

Ek weier om ‘n GPS stelsel te kry en twyfel of ek een sal gebruik.  Ek loer gewoonlik op ‘n kaart waar iets is, maak dalk ‘n nota of twee en daar gaan ek.  98% van die tyd werk dit goed uit.  Snaaks genoeg verdwaal ek meestal in Johannesburg.  Ek ry ook sonder ‘n kaart in die kar rond, as gevolg van suinigheid.  Ek weier om deur my neus te betaal vir iets wat ek van die internet kan kry.  Ek glo ook dat die vinnigste manier om ‘n plek te leer ken is om te verdwaal.

Het julle al opgelet dat mense wat naby die see groot geword het in die binneland glad nie hulle weg kan vind nie?  Dit is omdat hulle gewoond is om hulleself volgens die see te orienteer.  Snaaks genoeg, in my ervaring, is dieselfde nie waar vir die binnelanders nie.  Hulle is gewoond om hulle weg sonder bakens te vind.

Ek verdwaal nie maklik nie.  In dieselfde asem moet ek ook sê dat ek nie goed kan navigeer nie.  Nee, Nee.  Ek is heeltemaal instaat om ‘n kaart te lees en te volg.  My effense probleempie is nog ’n groter skande.  Ek ken nie elke dag links en regs ewe goed uit mekaar uit nie. 

Vertel my van julle verdwaaltogte?  Kan jy nog sonder GPS lewe?

Blogvraag:  Capella is die naam van ‘n ster wat vir navigasie gebruik word.  Wat beteken dit?

Blogantwoord:  Hertzogprys.

Baie welkom aan die nuwelinge (Sleepy Jane, Duskant, Kaalvoet, Annerkant, tussen die dorings.  Ek hoop julle gaan nog baie genotvolle ure tussen ons deurbring.  Vul gerus die aansoekvorm by bly te kenne in as julle ‘n kansie kry dat ons julle beter kan leer ken.