Feite, mites en pleinweg ouvroustories

Samantha Q is vandag (2 Julie) weer ‘n maagd.  Sy het presies 5 jaar gelede seks gehad, dit was in die tyd wat haar prins op ‘n wit perd in ‘n brulpadda verander het.  Ek is vandag die draer van slegte nuus.  Hierdie storie is net so waar as wat die storie waar is dat ‘n seuntjie sy maagdelikheid verloor as hy besny word.

Daar is baie ouvrou stories in omloop, sommiges word selfs deur dokters geglo.  Hulle was egter nie bewys nie of bevat ‘n baie klein deeltjie waarheid.  Soos dat wortel help dat jy goed in die donker kan sien.  Wortels bevat beta kerotien, wat help om Vitamien A te vorm wat wel goed is vir jou oë.  Nie dat dit jou help om beter in die donker te sien nie.

Van die ouvroustories wat ek raak geloop het, het ek ook wragtig gedink is waar.  As ek mos vandag ‘n sjokolade eet is ek more vol puisies.  Volgens verskeie bronne op die internet is dit ‘n wolhaarstorie.  Ek vermy ook suiwel as ek verkoue of hooikoors het.  Pure verniet, dit keer nie die slymproduksie nie.  Iemand het dit letterlik geweeg en gesien dat suiwel nie meer tot gevolg het nie.

Daar is regtig ‘n paar bizarre ouvroustories in die omtrek.  Soos dat jy nie swanger kan word as jy staan tydens seks nie.  Dit is wel moeiliker.  Jy kan ook swanger word as jy seks het terwyl jy menustrueer.  Wie het al die storie gehoor dat as jy na seks met jou bene in die lug lê dat jy wel swanger sal word?  Dan is daar natuurlik die klassieke masturbasie veroorsaak blindheid.  Vuil toiletsitplekke kan blykbaar veroorsaak dat jy swanger raak.  Van nou af is Domestos my beste maatjie.

Het jou ma jou dalk al ooit vertel dat jy gaan wurms kry van kaalvoet loop?  Of koue in jou vrouedele, weereens net iets wat iemand uitgedink het om kinders te dwing om skoene te dra.  Blykbaar is dit ook onwaar dat ‘n kuiken deur sy ma verwerp sal word nadat ‘n mens hom hanteer het.  ‘n Mens kry ook nie vraatjies van paddas nie, verkoue van koue weer nie en breinvliesontsteking van nat hare slaap nie. 

Eet en kou het ‘n hele paar ouvroustories van hulle eie.  Ongelukkig is dit heeltemaal onwaar dat jy nie sal vet word as jy staande eet nie.  Jy sal nie vet word van te vinnig eet nie.  Kougom gaan nie jou derms knoop nie, dit word net so normaal as ander kos uitgeskei. 

Daar is omtrent net soveel swangerskap ou vrou stories as ou vroue.  Veral oor goed wat die baba se geslag verklap.  As jy byvoorbeeld hoog dra is dit ‘n meisie en as jy laag dra is dit ‘n seun.  As die pa saam met die ma gewig optel, gaan dit ‘n seun wees.  As die baba se hart vinniger as 140 keer ‘n minuut klop, gaan dit ‘n meisie wees.  As die ma baie mooi raak tydens swangerskap, gaan dit ‘n seun wees.  ‘n Meisie steel glo haar ma se skoonheid.  ‘n Swanger vrou moet dit ook nie waag om haar arms bo haar uit te strek nie, dit gaan maak dat die baba met die naelstring verwurg.

Watter ander ouvrou of oumanstories ken julle?  Hoeveel waarde heg julle daaraan?  Was julle al ooit in die versoeking om dit oor te vertel?

Sam, jammer, jy het dalk al vergeet hoe, maar jy is nie weer ‘n virgin nie. 

Blogvraag:  Wie is die griekse godin van Onreg?

Blogantwoord:  Zoekoe was reg met No-One but you.