Geskenk van lewe

 Spesiaal vir die van julle wat nie van naalde hou nie!

Wie van julle het al ooit ‘n lewe gered?  Daar is duisende Suid-Afrikaners wat elke 2 maande tot en met 3 lewens red.  Stille helde, wat nie eers dink aan die verskil wat hulle 30 minute uitstappie maak nie.  Ek praat van bloedskenkers.  Eindlik is dit ‘n skande.  Duisende mense uit ‘n land van oor die 40 miljoen.  Selfs as 75% van die land HIV positief is (hipoteties gesproke), is daar nie eers 10 % skenkers nie. 

Dit is in die meerderheid van ons se vermoë om ‘n ander die geskenk van lewe te gee.  Vir vandag is die geskenk van lewe om iemand iets van jou te gee wat hulle lewe letterlik kan red.  Dit kan op 2 maniere basies gebeur.  Jy kan bloed skenk of jy kan ‘n orgaan skenker word.

Bloedskenk in Suid-Afrika is ‘n vrywillige skenking.  Daar is lande waar jou bloed gekoop word.  In SA word jou bloed net gekoop as dit vir navorsing gebruik word.  Wanneer mense teen vergoeding skenk, is bloed onveiliger.  As jy desperaat is vir geld, sal jy alles moontlik doen om dit te kry.  Vrywillige skenkings verhoed ook dat mense uitgebuit word.  Daar is mense wat ander sal dwing om te skenk en die geld vir hulle self sal hou.  Die van julle wat al ooit bloed nodig gehad het, weet dat dit nie goedkoop is nie.  Hoekom, veral omdat die bloed gratis gegee word?  Die bloed moet getoets en verwerk word, wat opsigself duur is.  Die bloedbank mense werk ook nie vir die liefde van die saak nie.

Dit is maklik om ‘n bloedskenker te word.  Ek dink dat as dit in jou vermoë is om te skenk en jy skenk nie, is dit uiters selfsugtig.  Jy weet immers nie wanneer jy of jou geliefdes bloed gaan nodig hê nie.  Om bloed te skenk moet jy ouer as 16 wees, meer as 50 kg weeg en ‘n gesonde lewenstyl volg.  Dit beteken basies net dat jy nie roekeloos moet wees nie.  Jy kan of bloed of plaatjies skenk.   Daar sal van jou verwag word om ‘n 4 bladsye vorm eerlik te voltooi.  Die bloei proses neem net ‘n paar minute, behalwe as jy plaatjies skenk.  Dan neem dit 2 ure.

Wanneer jy eendag die tydelike met die ewige verwissel, beteken jou organe nie vir jou iets nie.  Daarom dat baie mense verkies om orgaanskenkers te word.  Dit is nog makliker as bloedskenk.  Jy vul ‘n vorm in, kry ‘n plakker wat jy op jou lisensie plaas en maak seker jou familie gaan ja sê wanneer jou organe ge-oes word.  Weereens is dit vrywillige skenking.  Jy kan kies watter van jou organe geskenk mag word, mits dit natuurlik geskik vir gebruik is.

Ek het die onderskeie websites gegee waar nodig.  Die media is vol stories van mense se dankbaarheid van ander se geskenk op die lewe.  Dink daaroor en kyk of jy nie ook ‘n stille held kan word nie.  Dit kos jou immers niks.

Blogvraag:  Die eerste nieroorplanting in Groote Schuur hospitaal is deur Dr Christiaan Barnard gedoen as voorbereiding vir die hartoorplanting.  Op wie was dit gedoen?

Blogantwoord: 42.45 (gemiddeld).  43.21 jaar vir vroue en 41.66 jaar vir mans

Sam was die naaste… but no cigar!

Then again… die statistieke verander seker soos Zimbabwe se inflasie!