Assumption, my dear, is the mother of all *******

Mense ly almal aan ‘n ongeneeslike siekte, hulle dink almal is soos hulle.  Ironies, ons is veronderstel om individue te wees, maar ons verwag almal moet soos ons dink.  Hulle reken padvarke is die beste bestuurders, hulle neem aan almal ry soos hulle.  So ook is mense wat motors bestuur die beste voetgangers. 

Jy kan die wet van gemiddeldes haat soos wat jy wil, maar met aannames is ons almal gemiddeldes.  Ja, ons weet daar is mense wat nie soos ons is nie, maar as dit nie voltyds voor ons oë is nie, vergeet ons gerieflikheidshalwe daarvan.  Dalk moet ek ‘n paar voorbeelde gee.

Alle Afrikaners is Christenne en handaf dieselfde beginsels as ek.  Alle Indiërs is Moslems.  Alle mans wat net effens verfynd is, is gay.  Almal wat ek ontmoet en van hou is straight.  Almal wil graag op een of ander tyd kinders hê.  As iemand ‘n klompie jaar getroud is en daar is nie kinders, dan is die ma selfsugtig en stel haar loopbaan eerste.  Almal wat op die blog is, is so intelligent soos ek.  Of almal, behalwe ek is stok onnosel.  Almal wat nors is het probleme.  Almal kan die goed doen wat ek as vanselfsprekend aanvaar.  Ens.

Ja, ons weet dit is nie noodwendig waar nie, maar dit keer ons nie om dit te glo nie.  Veral in die blogwêreld is ons nogal geneig om siende blind te wees.  Ons vergeet gerieflikheidshalwe dat ons net sien wat mense wil hê om te sien.  Die van julle wat my al beter leer ken het, weet hoe baie lieg ek op die blog.  Daar was al mense wat regtig gedink het ek is 12.  Omdat ek aangeneem het hulle sal kan agterkom dat ek heelwat ouer is.

Gestel nou ek vertel julle vandag dat ek ‘n geslagsverandering geondergaan het.  Dit sal julle dadelik skok omdat dit iets is wat baie van julle nooit sal oorweeg nie.  Dadelik gaan almal dink dit is ‘n issue en begin wys dat dit nie vir hulle saak maak nie.  En dit gaan vir almal wat dit gelees het saak maak.  Of dalk neem ek nou te veel aan.

Ek dink die titel van vandag se blog hoort die 12de gebod in die Bybel te wees.  Hoe voel julle daaroor?  Praat ek net weer nonsens, of is daar ‘n mate van waarheid daarin?

Blogvraag:  Op wie se lewensverhaal is Pricilla, Queen of the Desert gebaseer?

Blogantwoord:  Sam was reg met Vivianne Joan Abbott Walker.